AP leh Manipur-ah Kristian an pung chak

Hmarchhak state Arunachal Pradesh leh Manipur-ahte Kristian an pung chak hle a, hetih lai hian Hindu sakhaw zuitu an tlahniam thung tih tarlan a ni. 

Hmarchak state pahniha Kristian pun chak thu hi tunhnai khan Union minister Kiren Rijiju chuan a sawi chhuak a ni. Rijiju chuan, India ramah Hindu sakhaw zuitu an tla hniam zel tih sawiin, a chhan chu Hindu-te'n sakhaw dang zuituteb an sakhua zawm tura an tih ve ngai loh vang a ni, a ti. Hetih lai hian Kristian an pung chak hle thung tih a sawi. Kum 1971 khan Arunachal-ah Kristian 1% chauh an awm a, kum 2011-ah erawh a mihring cheng zawng zawng aṭanga 30% an tling tawh a ni. Manipur-ah pawh Kristian an pung chak hle a, kum 1961-a Kristian awm 19% chu kum 2011-ah chuan 41% a tling phak a ni, a ti.

Arunachal-ah hian kum 2011 chhiarpui khan mihring maktaduai 1.3 an cheng a, Manipur-ah chuan mi maktaduai 2.8 an awm bawk. Manipur-ah hian kum 1961 khan Hindu sakhaw zuitu chu mihring cheng aṭanga 62% a tling phak a, hetihlai hian Kristian chu 19% chauh an la awm. Mahse kum 2011-ah chuan Hindu leh sakhaw zuitu hi an inzat vel tawha ngaih a ni a, 41% vel ve ve awm anga chhut a ni. State pahniha Kristian awm zat hi India rama Kristian sakhaw zutiu awm zat aṭanga 2% vel anga chhut a ni. Hindu sakhaw zuitu an tlem tial tial a, Kristian sakhaw zuitu an pung zel thung tih tarlan a ni.


Share this Post

Login to comment
No Comments