Bodo-te'n parliament budget session neih hmaa inbiakna neih an phut

Assam-a Bodo hnam te chuan Parliament budget session ṭan hma ngeia inbiakna neih an phut thu an sawi a, an thil phut a hlawhtling lo a nih chuan hmarchhak pumah lungawilohna an lantir tur thu an sawi. 

All Bodo Students Union (ABSU)-te chuan hemi chungchangah hian Thawhṭannni khan thuchhuah an siam a, parliament budget session ṭan hma ngei a, state pek an phut chungchangah state sorkar leh sorkar laipui-te nena inbiakna neih an phut thu an sawi. Bodoland state a pian theih nan Bodo-te hian hun rei tak chhung sorkar an nawr tawh a, tun thlengin an la hlawhtling lo. Hemi chungchangah hian Home Ministry-a joint Secretary Satyendra Garg pawh tun hnai khan inbiakna an lo neihpui tawh a ni. 

ABSU President Pramod Bodo chuan thil pali phut an neih thu sawiin, hemi a hlawhtlin theih nan hian sorkar nen inbiakna neih an phut thu a sawi. Central-a Congress kaihhruai United Progressive Alliance (UPA) sorkar a din lai khan, Bodo aiawh, Assam sorkar leh sorkar laipui aiawhte chuan Bodo-te'n state pek an phut chungchangah hian kum 2013 leh 2014-te khan inbiakna an lo nei tawh a, inremna a la awm thei lo a ni. An thil phut a hlawhtlin mai loh avang hian December 2016 khan Bodo pawl hrang hrangte chuan, Delhi-a Jantar Mantar-ah ni thum chhung lungawilohna lantirin nawrh an huaihawt a, Assam-a Bodo-te chenna huamchhunga relkawng te pawh an lo dang tawh a ni. 

ABSU President chuan an thil phut chu a la ngai reng tih sawiin, an thil phut chu inbiakna hmanga chinfel an duh tih a sawi. Assam-ah hian Bodo-te hi tribal hnam lian ber an ni a, Bodo Territorial Area Districts (BTAD) a ding mek a, hei hi state-ah hlankai an phut a ni. Bodo Territorial Area Districts (BTAD) hnuiah hian Kokrajhar, Baksa, Udalguri leh Chirang-te an awm. 

Heng bakah hian, Gobinda Basumatary leh Ranjan Daimary-te kaihhruaina hnuiah National Democratic Front of Bodoland a ding a, sorkar laipui nena inremna zawnga inbiakna neih duh pawl an ni. Mahse hei hi Songibijit I.K. kaihhruai NDFB(S) chuan an dodal thung. NDFB(S)-te hi kum 2016 August-a, Assam-a Kokrajhar bazar hmuna tharum thawna thlentute kha an ni a, he thil thlengah hian mi 14 an thih bakah, midang 20 vel zetin hliam an tuar a ni.


Share this Post

Login to comment
No Comments