Sorkar kum liam ta, 2017-18 chhung khan Mizoram sorkar chuan Mizoram Legislative Assembly member (MLA) ni lai leh an chhungte mi 17, damlohna vanga an inenkawla senso (medical reimbursement) atan Rs. 85,01,626 a sêng. MLA ṭang lai leh an chhungte MR bill hi sorkarin bat a nei ngai lo nia thu dawn a ni.
MLA ni laite kum khat MR bill-in kum khat chhunga hman tura ruahman (budget) a khûm ṭhin avangin Assembly Secretariat chuan Finance department-ah mamawh dan azirin an dil belh ṭhin. MLA zinga pahnih chu kal thlak ngai an nih avang leh MLA pakhat fapa thin thlak a ngaih avangin MR bill a san phah hle niin an sawi. Kum kal ta chhung khan MLA 28-te chuan MR bill an la lo.
RTI hmanga zawhna Assembly Secretariat-in an chhan danin, Mizoram MLA 40 zingah kum 2017-18 chhung khan MLA ṭang lai leh an fate mi 11-in MR bill an nei a, cheng nuai khat chuang MR bill la mi paruk an awm. MLA ni laite leh an chhungte tana MR bill zawng zawng hi kum khatah Rs. 73,61,547 a ni.
MLA-te'n an fate tana MR bill an lakah, MR bill tam ber Lalrinliana Sailo chuan Rs. 53,12,773 a bill a, PC Zoram Sangliana'n Rs. 8,45,887 a bill a; Dr Ngurdingliana'n Rs. 5,07,118 a bill bawk. Anni hi anmahni leh an chhungte natna khirhkhan bik, inenkawlna senso a sàn bik vanga bill tam zual an ni a; Rs. 1,00,000 aia tam bill nei MLA dangte chu - Lalrinawma (MNF) Rs. 2,42,222, Hmingdailova Khiangte (INC) Rs. 2,39,798, JH Roṭhuama (INC) Rs. 1,09,837-te an ni.
MLA panga dangin cheng nuai khat tling lo bill an nei a; chu'ngte chu - T Sangkunga (INC) Rs. 12,632, Lalrinmawia Ralte (INC) Rs. 8,933, R Vanlalvena (INC) Rs. 33,061, Joseph Lalhimpuia (INC) Rs. 32,716, K Sangṭhuama (MNF) Rs. 16,570 an ni. An zingah hian T Sangkunga bill chu Mizoram chhunga mi a ni a, mi dang zawng chu Mizoram páwna mi a ni thung.
MLA ni lai nupui mi paruk tan kum liam ta chhung khan Mizoram sorkarin MR bill-ah Rs. 11,01,046 a séng. MLA-te'n an nupuite damdawia an inenkawlna bill an neih dan chu - R Vanlalvena (INC) Rs. 2,45,007, John Siamkunga (INC) Rs. 3,63,451, K Sangṭhuama (MNF) Rs. 3,25,439, JH Roṭhuama (INC) Rs. 44,546, PC Zoram Sangliana (INC) Rs. 59,817 leh T Sangkunga (INC) Rs. 62,786-te a ni a; R Vanlalvena tih loh chu Mizoram páwna inenkawl vek an ni.
Chief Minister-in MR bill a neih dan erawh chu CM Office-ah zawh a ni a; CMO-in RTI Act hmanga zawhna an chhan danin, kum 2017-18 chhung khan CM Lal Thanhawla leh a nupui tan Mizoram páwna inenkawlna senso atan Rs. 39,033 hman a ni.
Chief Minister bik hi CMO-in an buaipui avangin Assembly Secretariat-in an enkawl MLA 39-te MR bill atan kum 2017-18 leh 2018-19 atan budget-ah Rs. 45,00,000 ve ve dah a ni a; kum 2017-18 chhung khan Rs. 85,01,626 hman a nih avangin, budget-a Rs. 45,00,000 an dah chu Rs. 4,001,626-in an khûm.
MLA ni lai leh an chhungte leh, MLA hluite leh an nupuite MR bill chungchangah hian 'The Mizoram Salaries, Allowances and Pension of Member of the Legislative Assembly Act 1999' Section 18 leh 18A tlawhchhanin bill pek chhuah ṭhin a ni.
