July 2018 aṭangin hnam dang motor Mizoramah hnathawh phal dawn lo

Mizoram Tipper Association Driver & Owners (MTADO) chuan nimin khan an pisaah thuthar thehdarhtute an kâwm a; dan loa hnam dang lirthei register a awm nual nia sawiin, hnam dang lirthei neitute chu July 2018 aṭanga an lirtheite Mizoram hna thawhtir tawh lo turin an hriattir.

MTADO president C Lalzarmawia chuan, tipper-a eizawngte chu an inrin loh hlan­in ram leilung fa ni lote'n an chîmral ṭêp tawh niin a sawi a, "Mizorama tipper-a eizawng tam zawkte chu sum leh pai neih sa nei lo, loan-a motor lei kan ni deuh vek a. Hetia hnam dang motor a rawn tam takah chuan hna thawh tur kan nei mumal ta lo a, phurrit phur kan awm ta nual a ni," a ti.

C Lalzarmawia chuan, Mizorama motor registration ti zingah hnam dang motor a awm nual thu sawiin, "Mizoram lehkha pawimawh nei miah lote pawh register an awm ta fur hi pawi kan ti. District tin DTO hian The Central Motor Vehicles Rules, 1989 zâwm se chuan lirtheia eizawngte min hum nghal dawn a ni," a ti a; Megahalaya leh Nagaland-te harsatna tawh ang an hlat tawh lo niin a sawi.

Motor neitu tam tak chu an ILP-ah chuan shop helper, godown helper, mistiri, mechanic, etc.-te an nih thu sawiin MTADO President chuan, "An ILP-in a huam baka khawsa leh sumdawngte'n min chîm mek a ni. An ILP-in a phalsak loh eizawnna an nei hi a mak hle," a ti.

MTADO chuan, hnam dang motor-te chu July 2018 aṭanga Mizoram chhunga hna thawk ve tawh lo tur an hriattir thu sawiin, hnam dang motor hna thawh an phal tâk loh vanga harsatna tâwk an awm a nih chuan an hriat­thiamna an ngen a ni.