Bairabi-ah sorkar zirna-inte an khâr

Bairabi-a Mizo Stu­dents Union (MSU)-te chuan Bairabi High School-a zirtirtu dah belh tura sorkar kar nan nimin aṭang khan Bairabi khua sorkar zirna-in zawng zawng an khâr a, khâr chhunzawm zel an tum.

Bairabi MSU-te hian Bairabi H/S-ah hian English leh Mizo zirtirtu dah an phût a, an thil phût hi a hlawhtlin hman chuan sikul khâr chhunzawm zel an tum a ni. Bairabi MSU president Laldinsanga chuan, "Sorkar aṭanga kan mamawh min pekna thuchhuah kan hmuh hma chu hei aia nasaa hmalak tum zel a ni ang," a ti.

Laldinsanga sawi dan­in, zirna-in an khâr hma hian School Education Minister leh bialtu MLA-te dâwrin, hma laksak turin an ngen a, awmzia a neih loh avangin sikul an khâr ta a ni. Bairabi H/S-ah hian English leh Mizo subject-ah zirtirtu an awm loh vangin kum tin heng subject pahnihah hian fail an tam a, HSLC 2018 result chhuak taah khan English-ah mi pali leh Mizo subject-ah mi pakhat an fail a ni.

Bairabi-ah hian sorkar zirna-in primary school panga, middle school pali leh high school pakhat a awm.