MIMER vangin seat tlem loh beisei

Mizoram Institute of Medical Education & Research (MIMER)-ah kumin aṭangin class ṭan tum a ni a; MIMER avang­in MBBS leh BDS-ah Mizoramin kum danga seat a chan ṭhin chu a chan chhunzawm an beisei thu Higher & Techincal Education (HTE) depart­ment hotute'n Vanglaini an hrilh.

Zawhna chhanga HTE department hotute'n an sawi danin, state danga an tih ṭhin dan an zirchianna aṭangin mahnia medical college neite chu Central quota-a MBBS leh BDS seat an neih an tihtlemsak nghal ngai lo. Tun dinhmunah Mizoramin MBBS-ah quota Central pool-ah 17 leh NEC-ah 13 a nei mek a, BDS-ah chuan Central pool-ah seat pariat leh NEC hnuaiah seat pasarih a nei a ni.

MBBS leh BDS zir tur thlanna, National Eligibility cum Entrance Test (NEET) chu May 6, 2018 khan ram chhung hmun dangte rualin Mizoramah pawh exam a ni a, Mizo naupang 1,200 velin an hmachhawn a ni.