Nuam tâwla sorkar silai kâpah minister puh; Congress ṭhalai hmingin kan kâp lo - MPYCC

MNF MLA Lalruatkima chuan nimin khan Mizo Hnam Rûna inkhawmah thu sawiin, minister Zodintluanga leh Congress ṭha­laite'n May 12, Inrinni khan nuam tâwl nan sorkar silai an kâp chiam niin a sawi a, silai mu an kah ralte chu rùl leh vek turin a phût. Hetih lai hian, MPYCC chuan, Congress ṭhalai hmingin silai an kap lo tih an tarlang.

Lalruatkima chuan, Minister leh Congress ṭhalaite'n silai an kahna hmun chu 1st. IR hmunpui Mualvûmah a ni tih sawiin, "Bûng Bangla quarry chimah nunna chán pali lai an awm a, Zoram a rûm mek laiin Minister leh Congress ṭhalai hruaitute'n nuam tâwla sorkar silai an kap chiam mai hi a mak kan ti a. Laipuitlanga leimin rapthlak a thlen khan Chief Minister berin a biala inzaisiak a lo en daih tawh bawk. Mipuite min ngaihsak lohzia a chiang hle a ni," a ti.

Minister leh Congress ṭhalaite silai kah chu AK-47, INSAS Rifle, M-4 Rifle, Glock pistol leh 9mm. pistol-te a nia sawiin Lalruatkima chuan, "Sorkar silai hi restricted arms a ni a, civil mi tan kah ve ngawt theih a ni lo. Dan phal lohin sorkar silai nuam tâwl nan sum tam tak hekin an kâp a. M4 leh Glock pistol-te phei chu a mû pawh man to tak a ni," a ti a; mipui suma lei silai mute ṭul loa tihrîral mai mai tur a ni lo tih a sawi.

Lalruatkima hian minister Zodintluanga chu dan pêlin a thuneihna hmang sualah a puh a, silai mû an kah riralte chu rûl leh vek turin a phût a ni.

MLA Lalruatkima chuan, May 12, Inrinni zinga Bung Bangla quarry chima thite chu MNF-in an tawrhpui tak zet tih a sawi a, "Sorkarin chhiatrupna thlenga nunna chánte zangnadawmna pek tura dan a neih ang ngeiin, nunna chante Rs. 4,00,000 ṭheuh pe vat rawh se," a ti bawk.

Hetih lai hian, nimin vek khan Congress ṭhalaite chuan thuchhuah siamin, MLA Lalruatkima’n Congress ṭhalaite’n sorkar silai an kâp anga a sawi chu thu dik lo niin an sawi a, "Mipui thlan chhuah MLA meuhin dâwta Congress ṭhalaite min puh hi pawi kan tiin kan ngai thiam lo tak zet. Congress ṭhalai hming hian sorkar silai hi kan kâp reng reng lo tih lo hre turin kan hriattir nghal a, tun hnuah thu belchian dâwl lo hmangin Congress ṭhalaite min puh tawh lo turin kan hriattir nghal bawk," an ti.

MPYCC chuan, MLA Lalruat­kima chuan Assembly bud­get session hnuhnung berah pawh Envi­ronment, Forest & Climate Change department-in silai tun an dah­ṭhat a bothlau niin a sawi tih tar­langin, "Khami ṭum pawh khan fin­fiahna nei mumal loin budget ses­sion-ah a au chhuahpui hial tawh a ni," an ti a; Lalruatkima thu­sawi chu awih chin tâwk nei turin mipuite an ngen a ni.