Planning & Programme Implementation department hnuaia State Institute for Transformation (SIT), Mizoram chuan NITI Aayog’s State Support Mission hmalakna peng pakhat atan Mizoram Assembly House Conference Hall-ah 'Transformed Mizoram Vision 2047 Roadmap Workshop' a buatsaih a; khuallian chief minister Lalduhoma chuan, Mizoramin hmasawnna a tukve mek rualin, tum ang hmasawnna erawh an la neih loh thu a sawi.

Chief Minister chuan Mizoramin hun kal tawhah harsatna tam tak - rambuai, Covid hripui leng, khuarel chhiatna hrang hrang leh thil dangte a lo paltlang tawh thu sawiin, "Chuti chung chuan hmasawnna rahbi pawh nasa takin a tuk ve mek zel a ni. Amaherawh chu, kan duh ang leh tum ang hmasawnna erawh kan la nei lo tih chu kan pawm tlan ngam a ngai thung ang. India-in kum 2047 ral hmaa ram hmasawn (developed countries) zinga inhlankai ve tuma beihpui a thlakna Vikshit Bharat @2047 zin kawngah hian Mizoram pawhin zinkawng thui tak kan hmabak," a ti.

Mizoramin a tih hmasak tur chu governance leh delivery-a hmasawn a nih thu sawiin Chief Minister chuan, "Chumi tur chuan productive sectors - agriculture and allied activities, industries,tourism, leh digital economy-ah te hma kan sawn a ngai a, chu chuan kan ṭhalaite tan sum lakluhna leh eizawnna a siam dawn a ni," a ti a, India ram leh India ram pawn lamah pawh hna zawng thei tura Mizo ṭhalaiten innovation and technology-a thiamna (skills) an neih theih nan quality education and training hmangtea tahhriam an ngaih thu a sawi.

Lalduhoma chuan inthlak danglamna (transformation) chu programme thar siam ringawt a nih loh thu sawiin, "Inthlak danglamte chu a ṭha lo kalsan ngam tura huaisenna neite hi an ni. Mizoram tihhmasawn nana workshop pawimawh tak, mithiam rual kalkhawmin in duan mek lai hian kan Mizo identity innghahna tlawmngaihna te, kan rinna te, kan hnam nunphung leh ziarangte hi kan hmasawnna chuan mausam lo se. Kan hmasawnna chuan khawvel hmasawnte rualin ke min pentir se, kan identity ti nghet zual sauh zawk rawh se," a ti.

Chief Minister chuan khawvelah hian eng ram mah hmasawn sa an awm loh thu sawiin, "Hmasawn hi tihpalh thilthua lo awm pawh a ni lo, kum tam tak sorkar leh ram mipuiten hmathlir (vision) neia an lo thawh chhuah rah a ni zawk ṭhin. Mizoram te ang, state lian lo, tlangram chhengchhiaa awm, mawi si, a mi chengte lehkha thiam, taima leh talent nei ṭha bawk si tan phei chuan hmathlir ṭha neih hi a pawimawh lehzual a ni," a ti a, state, district leh local bodies inkarah tawhhona tihchak a, a mal ang ni loa team anga chak taka thawhho thiam dan ngaihtuah a ṭul thu a sawi.

Workshop-ah hian DPAR minister K Sapdanga leh minister dang eng emaw zat an tel a; technical session tinah department 6/7-in an department hmathlir ṭheuh entirin, district bawrhsap pakhat zelin 'Sharing of Best Practices' presentation an nei a, head of department pakhatin 'Interactive Session & Summarization' hun an hmang zel a ni. Technical session hman zawhah hian Chief Minister chuan hmawrbawkna (concluding remarks) sawiin, workshop hi a khar a ni.