Rohmingthangi hriatrengna in khawih vangin YMA leh MZP an lungawi lo

Central YMA chuan, missionary martar Rohmingthangi hriat-rengna in, Rajiv Nagar khua, Mamit district-a sak, Chakma-te'n an suasam ṭhin chu YMA-te'n an hriathiam loh thu leh, CYMA-in a ṭul anga hma a lak dawn thu an tarlang.

Nimin khan YMA Central Coordination Committee (CCC) meeting vawi 107-na neih a ni a; thuchhuah siamin, "Tun hnaia Rajiv Nagar khuaa missionary martar Nl. Rohmingthangi hriatrengna in sak, Chakma-te'n ṭum eng emaw zat an lo suasam chungchang leh October 25, 2026-a Hruiduk khuaa mitthi (Kristian) inphûm thei lo khawpa Chakma-te'n harsatna an siam hi kan hrethiam lo hle. Hemi chungchangah hian CYMA chuan a ṭul angin hma a la zel dawn a ni," an ti.

MZP General Headquarters hruaitute pawhin November 10, Thawhlehni khan Mizoram Chakma Students' Union(MCSU) Zonal Hqrs, Aizawl hruaitute MZP Pisapuiah an ko a; Rohmingthangi hriatrengna in suasam a ni fo chu ṭha an ti lo a, bungraw tihchhiat leh suasam a ni leh a nih chuan MZP-in hma an lak tur thu an hrilh. Khawih a nih tawh loh nan hma la turin MCSU hruaitute an chah bawk.

MZP hruaitute hian Aizawla MCSU hruaitute chu Surita Chakma, MuroMuri Agency neitu chungchang an sawipui bawk a; Surita Chakma chu tunkar chhung ngeia ngaihdam dilna video siam tura hrilh turin MCSU hruaitute an chah a ni.