Serchhip District MJA member-te'n Tualpuia loneitute hnathawh an en

MJA, Serchhip District member-te chuan nimin khan Agriculture department-in Tualpui khuaa kut hnathawktute hmalakte an en a; tung chìnna hmun leh tlang ram loa nihawichi leh tomato chìn kawptirna hmunte an tlawh.

Serchhip MJA member-te hi Khawzawla Agriculture officer Lallawmzuali leh a thawhpuite'n an lo dawngsawng a, inkawmhona hun hman a ni. Lallawmzuali chuan, an hmalaknate sawiin, loneitute chu lo number pawt loa huan nghet neihtir tumin hma an lak thu te, an bial chhungah lo number pawt tawh lo an awm nual thu a sawi.

Khawzawl DAO chuan, loneitute chu an thlai duh an chintir a, department-in khawl a ngaihtuahsak thu a sawi a; nihawichi tél sâwr hunah nihawi tél zawrh chhuah paha Nihawi Kût hman an tum thu a sawi bawk.

MJA member-te hian Tualpui an tlawhnaah VC president C Lalromawia leh Tualpui Tung Chingtu Association hruaitute'n an lo dawngsawng. Nikum aṭangin Agriculture department hmalaknain tung an chìn ṭan thu te, chhungkaw 100 chuangin tung an enkawl mek thu te, tung ṭiak 20,000 chuang an phunah 12,500 vel nung ṭha a awm thute an lo hrilh a ni.