Minister-in Aizawl hmar lam tui harsatna tihziaawmna tur hnathawh mekte a tlawh

PHE minister Prof. Lalnilawma chuan November 10, Thawhlehni zan khan SASCI Part-I hnuaia cheng vbc 22.69 senga Aizawl hmar lam tui harsatna tihziaawmna tur Aizawl Northern Feeder Pipeline Project hnathawh mek a tlawh.

Prof. Lalnilawma chuan, hnathawk lai a tlawh chhan sawiin, "Chhun zan zawmin an thawk ṭhin a, minister ka nih angin, an thawh hlâwkzia te, an dinhmun leh harsatnate a hmunah mit ngeia hmuhpui bakah, an thâ tichak zel turin ka awm a ni tih an hriat ka duh a ni,” a ti a; PHE department-a thawkte an thawhrim thu a sawi.

Tuna pipe phûm mekin mipui nunphung nasa taka a tihbuai avangin pawi an tih thu sawiin PHE Minister chuan, "Hna hi mipuite'n tui hnianghnar zawk an dawn theihna tur a nih avangin hrethiam turin ka ngen a ni. Aizawl leh Mizoram hmun hrang hrangah PHE-te’n hna kan thawhin mipui ṭawiawmna kan dawng ṭha a, khawtlang hruaitu nen pawh kan thawhhona a ṭha ṭhin em em a ni," a ti.

Aizawla tui pek dan tihchangtlun nan Strengthening of Aizawl Water Supply Scheme siam niin, SASCI Part-I aṭangin cheng vbc 22.69 ruahman a ni a; project hi January 21, 2025 khan hmuh niin, November 13, 2025-ah hna thawh ṭan a ni. Project-a hna pawimawh ber chu, Laipuitlang tuizem aṭanga Aizawl hmar lam venga tui sem chhuahna pipe lian pathum phûm a ni.

Project hi Greater Aizawl Water Supply Scheme Phase-III, 37 MLD capacity-in tui a pekte mipui thleng tura sem chhuah zung zung a nih theihna tura hmalakna a ni a; February 2027-ah zawh beisei a ni.

Laipuitlang aṭangin Durtlang Booster Pump House thlengin metre 3,700-a thuiah ERW pipe mm 323.9 phûm tur a ni a, tunah hian Bawngkawn leh Durtlang inkarah phûm mek niin, hmabak metre 820 vel a la awm.

Zemabawk Zonal Tank thleng turin metre 8,000-a thuiah GI pipe mm. 200 phûm a ni bawk a; Ṭhuampui Zonal Tank thlengin metre 5,300-a thui GI pipe nn. 150 phûm zawh tawh a ni.

Zemabawk pipeline aṭangin Berawtlang Zonal Tank thlengin metre 1,600-a thui GI pipe mm. 150 phûm mek a ni a; Berawtlang Zonal Tank aṭangin Bung Banglaa Mizo Territorial Army awmna tur thlengin tui pekna pipeline siam zawh tawh niin, tui pek a ni tawh.

Durtlang Booster Pump kaltlangin Durtlang, Selesih, Sihphir, Neihbawih, Nausel, Zuangtui, Muanna Veng, Falkland Veng leh a chhehvela veng dangte'n tui hnianghnar zawk an dawng thei dawn a; Falkland Vengah tuizem lian, tui litre 3,00,000 siam zawh tawh niin, hman mek a ni.