North America box office-ah thawm rawn nei lian thar an awm lo. 'Five Nights at Freddy's' chu a kar hnihnaah ticket hralh chhuah 76% zetin tla hniam nghal mah se, luahlan zo an la awm lo a, hma a la hruai chhunzawm.
Supernatural horror film hian US mtd 19.4 lak luh belhin, domestic-ah a sum hmuh hi USD mtd 113.6 leh, overseas-ah USD mtd 103.5 a tling tawh. USD mtd 20 production budget hian khawvel huapin USD mtd 217.1 a hmu tling tawh a ni.
'Five Nights at Freddy's' hi streaming service Peacock-ah pek a ni bawk a, hei hi ticket sales tlak hniam nasatna chhan ni ngaih a ni bawk. Mahse kumina horror movie chhuak zingah chuan sum hai lut hnem ber a ni tawh tho.
"Taylor Swift: The Eras Tour" leh Martin Scorsese's "Killers of the Flower Moon" chu pahnihna leh pathumnaah an la awm chhunzawm bawk a, USD mtd 13.5 leh USD 7 an lak luh belh. Palinaah tlangzarh thar, Priscilla Presley biopic 'Priscilla' chu rawn langin, theatre 1,259-ah tihchhuah a ni a, USD mtd 5.1 a la lut. Mexican comedy-drama film, 'Radical' chu hmun 419-ah chauh tihchhuah a ni chungin USD mtd 2.7 a hmu thei a, top 5 a rawn khar.
