Seoul Music Awards nomination-ah Army lawm lo

33rd Seoul Music Awards nomination chu tihchhuah a ni a, nomination list-ah BTS member palite chu category hrang hranga an lan laiin, Suga leh RM erawh an lang ve lo. Army lam an lawm lo a, social media lamah “Seoul Music Awards Rigged" tih chu an trending-tir nghal.

Korean music industry lama che ṭha te chawimawina, 'Seoul Music Awards' hi kum 1990 aṭang khan kum tin neih leh sem a ni. 33rd Seoul Music Awards hi a ṭum khatna atan South Korea pawnah sem a ni dawn a, Thailand khawpui, Bangkok-a Rajamangala National Stadium-ah January 2, 2204 hian sem a ni dawn. Tun ṭum award hian January -December, 2023 chhunga hla leh album tihchhuahte a huam dawn a, winner thlanna turah hian online voting-in 30%, panelist 40% leh sales in 30% an pu dawn a ni.

Award semnaa perform tur pawh Thawhlehni khan puan niin, GOT7’s BamBam, Kang Daniel, KISS OF LIFE, STAYC, Girls’ Generation’s Tiffany, Sandara Park, Young Tak, NMIXX, GOT7’s Youngjae, NCT DREAM, RIIZE, leh ZEROBASEONE-te an tel.