Oakland kawtthler 'Tupac Shakur Way' tiin phuah

Rapper fam ta, Tupac Shakur hriatreng leh chawimawina atan Oakland, California-a kawtthler pakhat chu 'Tupac Shakur Way' tia phuah a ni.

'Tupac Shakur Way' hi Oakland khawpuia MacArthur Boulevard area-a section pakhat niin, he hmun hi 1990s-a Tupac-a lo chenna bul a ni. Kar liam ta khan kawtthler hming thar hawnna inkhawm hi neiin, he hunah hian a chhungte pawh an tel a ni. Ha hunah hian a farnu, Sekyiwa 'Set' Shakur, MC Hammar bakah Money-B leh Oakland hip-hop legend Too Short te pawhin thu an sawi. Shakur hian Oakland hi a music career bul a ṭanna niin, a tirah chuan dancer a ni a, Digital Underground member a nih hnuah, a debut album ' 2Pacalypse Now' chu 1991 khan a tichhuak a ni. Kum 1996, September 7 khan Las Vegas-ah silaia kah niin, a hnu ni rukah a thi a ni. Khawvela raper hlawhtling ber leh huhang ngah ber zingah tun thlengin chhiar tel a la ni.