South Korea ram par-liament inthlanpui neih zawh takah rorellai, Seanuri party chuan kum 16 hnuah majority a nei pha lo.

Result hi a kimchangin hriat la ni lo mah se, hriat tawh chinah centre-right Seanuri party hian seat 300 aṭangin seat 122 a la a, eptu Minjoo Party chuan seat 123 a la.

Seanuri party hruaitu, Kim Moo-sung chuan an party chak loh chhanah mawhphurhna lain, nimin khan party hruaitu a nihna aṭangin banna a thehlut nghal. Rorellai party chak loh vang hian President Park Guen-hyei-i tan pawh nakkuma president thlanna neih turah a dinhmun a tih derthawn phah rin a ni bawk.

President Park-i hi an ram economy a enkawl danah sawisel a hlawh hle a, thuneihna a chan hnu hian ṭhalai hna nei lo an pung chak a, an ram thil thawnchhuah a tlakhniam bakah leiba an ngah phah hle a ni.

Eptu party lian ber, Minjoo Party chu inthlan hmaa mipui ngaihdan lak laiin a che
ṭha a, an party mi leh sate chuan an lawm nasa hle. Eptu party dangte pawh kum dang aiin an che ṭha a, party ding thar People's Party chuan seat 38 lain Justice Party chuan seat ruk a la. Independent candidate 11 thlan tlin an ni bawk. Eptu party hrang hrangte hian parliament seat 167 an nei pha a, hei hi kum 16 chhunga eptu lamin majority an neih vawi khatna a ni.

Seanuri party thu-puangtu, Ahn Hyung-Hwan chuan inthlan result leh mipuite duhthlanan chu an pawm thu sawiin, "Kan lakah mipuite an lo lawm tawh lo a, mahse hei hi kan lo hrethiam lo a ni" a ti.

Nilaini-a parliament inthlanah hian member 300 aṭangin mipuiten an vote hmangin member 253 an thlang chhuak a, a bak seat 47 hi a pumpuia vote an hmuh tam dan a zirin party hnenah pek a ni ang.

Vote thlakna tur hian polling station 14,000 vel siam a ni a, vote tla hi 58% a ni.