Boko Haram-ten an hmeichhe mante video tichhuak

Nigeria rama Islamist helpawl, Boko Haram-ten video an tichhuah tharah kum hnih liamta-a Chibok khua aṭanga school naupang, hmeichhe tleirawl an rukbo zinga ṭhenkhatte an tilang.

Video an tihchhuah hi nikum December thlaa an lak a ni a, Nigeria sorkar hnenah video hi an thawn, an hmeichhe rukbo zinga mi 15-te chu thawmhnaw dum hain an lang a, Chibok khua aṭanga helhoin an rukbote an nih thu an insawi a ni.

Kum 2014 April thla khan helho hian Chibok khua aṭangin hmeichhe tleirawl 276 an rubo a, hemi kum May thla khan an hmeichhe rukbote lanna video hi an tichhuak a, tun ami hi an lanna video an tihchhuah leh hmasak ber a ni. Hmeichhe tleirawl rukbote chhuah zalen an nih theihna atan hian khawvel ram hrang hrangah social media hmangin campaign neiha ni a, mi lar tak takte an campaign a, US first lady Michelle Obama pawh a campaign a ni.

Nigeria sorkar pawhin chhan­chhuah tumin theihtawp chhuah mah se, an zinga a tam zawk chu an chin hriat a la ni lo.

Hetihlai hian hmeichhe rukbo nu leh pate chuan an ram khawpui, Abuja-ah an fate zawngchhuak tura nasa zawka sorkar chu hma la tura phutin kawngzawh huaihawt an tum.

Helhoin an man zinga mi 57 chu an tlanchhuak thei a, mahse tun thlengin midang 219 te chu an chin hriat a ni lo. Boko Haram leh Nigeria sipaite hi an la inbei reng a, helpawl hi an che chhe
ṭan nia sawi a ni. Sipaite hian helho thunun khaw eng emaw zat chu an la tawh a, an mi man tam tak an chhanchhuak tawh bawk.