Israel-in West Bank-a in 300 sakna tur pawm

Israel sorkar chuan Palestinian ram a luah, West Bank-a Juda-te chenna tur in 300 sak belhna tur a pawm niin Ha'aretz daily chuan a tarlang.

Prime Minister Benjamin Netanyahu leh Defence Minister Moshe Ya'alon te chuan thla hmasa khan in 300 sak thar tum a nih thu hi an lo sawilang tawh niin a tarlang bawk.

Israel hian 1967 Mideast War atang khan West Bank, East Jerusalem leh Gaza Strip te a luahsak a, heng hmunah hian Juda-te chenna tur in eng emaw zat a sa tawh a ni.

Hei hi Palestinian bakah ram hrang hrangte chuan sawiselin, international law kalh niin an sawi.

West Bank-a in sak thar tur zinga in 54 chu Har Brakha hmunah sak a ni dawn a, Revava-ah in 17, Ganei Modi'in-ah 48, Tekoa-ah 34, Nokdim-ah 70 leh Givat Ze'ev-ah in 76 sak a ni ang.