Supreme Court chuan state sorkarten an state pawn lama advertisement an tihchhuah ṭhin titawp tura ngenna thehlutte ngaihtuahin, hemi chungchang hi chhang turin sorkar laipui leh state sorkarte a hriattir.

Justice DY Chandrachud leh Hima Kohli awmna bench chuan ministry of information and broadcasting bakah state tinte hriattirna a pe a ni.

NGO Common Cause chuan Supreme Court-ah hian petition thehlutin, state sorkarte chu an bial pawn lamah advertisement tihchhuah khap turin a ngen a ni. Bench chuan engtin nge state sorkar chuan an khap theih ang tia a zawh rualin, chhanna pe turin state sorkarte chu a hrilh ta tho a ni.

Bench chuan state sorkarte chu an bial chhungah investor-te hip luh a duh a, state dang aṭanga sumdawnna ṭha leh tam zawk lakluhdan zawng turin, an state chhunga hnathawh hrang hrangte chu state dang mipuite hmuhah an pholang ve duh a ni thei tiin a sawi. Hetih lai hian NGO aiawha ding, advocate Prashant Bhushan chuan state sorkarin advertisement a tihchhuahte hi investment ti tura midangte hip luh tumna lam a ni lo tih a sawi thung. 'Public fund chu mipuite tana hna thawhna tur a ni a, political advertising atana hman tur a ni lo," a ti.