District ṭha zual 10 thlanchhuahah Sikkim district a tel

Sikkim-a Pakyong district chu 'Azadi Se Antyodaya Tak (ASAT)' 90-day inter-ministerial campaign neihna, India ram district 75 zingah a ṭha zual 10-ah telin, 8-na a ni.

He campaign hi April 28 khan ‘Azadi ka Amrit Mahotsav’ peng pakhat atan neih ṭan niin, India ram zalenna sualna kawnga tha thawhtute nena inzawmna nei,district thlan chhuah a hmasawnna hna thawhna atana tih a ni. State 27 leh UT pakhatah district 75 thlangin, heng hmunah hian central ministry/department pakua hnuaia scheme 17 kalpui a ni.

District thlanchhuah bika scheme hrang hrang thawhna kawngah Pakyong district hi a tiṭha zual 10 zingah telin, union ministry of rural department-in New Delhi-a chawimawina hlanna inkhawm a buatsaihah Pakyong district magistrate Tashi Chophel leh ADC Anupa Tamling-ten award hi an dawng a ni.

DC Tashi Chopel chuan theihtawp an chhuahna avangin he chawimawina hi dawng thei a ni tih a sawi a, award an dawn chuan hun lo kal zel turah pawh chona nasa zawk hmachhawn turin inrintawkna a pe a, an hlawhtlin chhoh zel an beisei tih a sawi. DC chuan district chhunga department hrang hrang hotute chu hun tiam chhunga an target an tihhlawhtlin theihna tura an inpekna avangin lawmthu a hrilh bawk.