Nagaland-ah Rs vbc 1,300 chuang senna project 416 zawh lohin awm

Nagaland sorkarin cheng vaibelchhe 1,300 chuang a sen tawhna, project 416 chu zawh fel lohin an la awm tih Comptroller and Auditor General (CAG) report chuan a tarlang. Heng project zinga ṭhenkhat chu kum 20-te an tling tawh a ni.

CAG buatsaih State Finances Audit Report hi chief minister Neiphiu Rio chuan Nagaland Legislative Assembly session neih zawh takah khan a pharh a ni.

March 31, 2021 thleng khan department 36 hnuaia kum 2003 aṭanga project a thawh 416 chu zawh fel lohin an la awm a, heng project atan hian sorkar chuan Rs vbc 1,380.04 a seng tawh a ni, tiin report chuan a tarlang.

Report chuan kum 2003-2011 inkara project thawh, zawh fel si loh hi 63 awmin, heng atana sum sen tawh hi Rs vbc 722.61 a ni a, kum 2011-12 khan project 19 atan Rs vbc 67.96 hmangin zawhfel an la ni lo bawk. Kum 2012-13-ah project 39 thawkin, Rs vbc 132.86 sen a ni a, tun thlengin zawh an la ni lo a, sum ruahman aiin Rs vbc 25.84 in an seng hnem tawh zawk a ni.

Heng bakah hian project thawh zawh loh hi kum 2013-14 ah 134 (Rs vbc 53.55), 2014-15-ah project 59 (Rs vbc 23.98), 2015-16-ah 21 (Rs vbc 96.18 ), 2016-17-ah 10 (Rs vbc 11.98 ), 2017-18-ah 34 (Rs vbc 67.48), 2018-19-ah 9 (Rs vbc 42.78), 2019-20-ah 4 (Rs vbc 5.28) te an awm bawk. Kum 2020-21 ah erawh chuan project zawhfel loh a awm lo.

CAG chuan project-te hun tiam chhunga zawhfel loha tihkhawtlai zel chuan hnathawh a tihchhiat bakah, sum sen pawh a hautak belh zel niin a sawi. Hei vang hian project hrang hrangte zawhfel an nih thuai theihna tura hma lak a ṭul thu a sawi a ni.