Nagaland-ah Thawhlehni khan Covid-19 kai hmuh chhuah mi 53 an awm belh leh a, ni 100 chhungin hri kai hmuh chhuah hi mi 4,003 an tling tawh a ni. 

Hri kai hmuh chhuah thar zinga 29 chu tualchhunga hri kai tawhte aṭanga kai chhawng an ni a, armed force mi leh sa 11 leh state dang aṭang haw pariat an tel a, frontline worker panga an awm bawk. 

Health minister S Pangnyu Phom chuan Thawhlehni vek khan hri kai zinga 133 chu an dam tawh vangin damdawi-in aṭanga chhuahtir an nih thu a sawi. 

Nagaland state chhunga hri kai hmuh chhuah hmasa berte chu May 25-a Tamil Nadu aṭanga haw mi pathumte an ni. Hemi hnu hian June 1 leh June 18 tih lohah chuan nitin hri kai hmuh chhuah belh zel an la ni. 

Hri kai hmuh tawh mi 4,003 zinga 3,191 chu enkawl dam an ni tawh a, mi pariatin an thihpui tawh. Hri kai zingah hian armed force mi leh sa 1,703 awmin, state dang aṭanga haw 1,268 an tel a, tualchhung aṭanga kai chhawng mi 744 bakah frontline worker 288 an tel.