ICFAI University-in Convocation hmang

ICFAI University, Mizoram chuan November 6, 2026 khan Convocation vawi 14-na an hmang a; ICFAI University, Mizoram visitor Governor Gen. Dr Vijay Kumar Singh-a'n hmanpuiin, gold medalist mi 15 hnenah medal leh certificate a hlan.

Gen. VK Singh chuan, degree nei tharte leh ICFAI University-in doctorate degree a pekte a lawmpui thu a sawi a, "Convocation hian in thawhrimna leh inpekna a entir a ni. Vawiina zirlaite hian nu leh pa leh zirtirtute phûrna tipuitling thei tura inzirin hma lam in pan zel tur a ni a, degree in dawn hi in zir zelna leh khawtlang tana mi chhenfakawm ni tura lungthu pawimawh a ni," a ti.

Khuallian VP Joy, Reliance Industries Ltd senior executive vice president pawhin thu sawiin, zirlaite chu phûrna leh duhna tak tak neia lehkha zir turin a fuih a; mi dangte nena inlaichinna ṭha neih ngai pawimawh tur leh an thiamnate tuaithar zel turin a fuih.

ICFAI University, Mizoram Convocation-ah hian department/subject 16-a zir lai zir zo mi 216 hnenah degree hlan a ni a; chungte chu post graduate 172 leh under graduate 44 an ni.

ICFAI University hian Mizo ṭawng, thu leh hla leh zirna lama an thawh hlawk avangin Prof. Laltluangliana Khiangte leh R Lalrawna hnenah leh, hmeichhiate dinhmun chawi kânna tura thawh hlawk vangin B Sangkhumi hnenah honorary doctorate degree an hlan bawk.

ICFAI University, Mizoram hi ICFAI Group hnuaiah kum 2006 khan din a ni a, zirlai 509, faculty member 64 (regular 33 leh visiting 31) leh non-teaching staff 16 an awm mek. Post graduate-ah programme 11 leh under graduate-ah programme paruk neiin zirna an kalpui mek a ni.