MUHCS atan ADB-in loan a pe ṭan; Pek vawi khatnaah vbc 205.48

9th November, 2026

Mizoram Universal Healthcare Scheme (MUHCS) kalpui zelna atan Asian Development Bank (ADB) aṭanga loan lak tur aṭangin sum hmuh ṭan a ni. Loan hi Support for Mizoram Universal Health Coverage hnuaia pek tur a ni a, ADB chuan a ṭum khatna atan pe chhuakin, Mizoram sorkarin November 5, 2026 khan cheng vbc 205.48 a dawng.

MUHCS atan loan la tur hian Mizoram sorkarin disbursement link indicator (DLI) pahnih a tihlawhtling tawh a, hei vang hian ADB chuan October 29, 2026 khan sorkar laipuia Ministry of Finance-ah US dollar maktaduai 21.6 (cheng vbc 205.48) a pe a; Ministry of Finance chuan November 5, 2026 khan Mizoram sorkar hnenah a rawn pe (account-ah a thun) ve leh a ni.

Cheng vbc 205.48 aṭang hian cheng vbc 20.54 (10%) chu loan angin a rawn pe a, cheng vbc 184.93 (90%) chu grant angin a pe thung. Pawisa hi MUHCS atan corplus fund-ah dah tur a ni.

Kuminah hian DLI pathum tal tihpuitlin (achieve) leh hman tum a ni a, cheng vbc 130 vel tal hnuh chhuah leh hman tum a nih thu Finance department hotute chuan an sawi.

November 2026 thla tira Chandigarh-a Tripartite Review Meeting-ah Mizoram Finance department hotute'n MUHCS atana ADB aṭanga loan lak chungchang hi Department of Economic Affairs leh ADB hotute hnenah an thlen a ni. Ṭhutkhawmah hian Finance secretary Ramchuana leh department hotu dangte an tel.

ADB loan la tur hian January 23, 2026 khan inremna ziah a ni a, ADB team rawn tirin, project effective date atan April 1, 2026 ruat a ni.

DLI hi chi hrang hrang a awm a, A, B leh C-ah ṭhen a ni. Tihhlawhtlin hun chhung tur leh tihhlawhtlin huna dil theih zat bituk a awm. Tihhlawhtlin tur hmasa berah pahnih a ni a, tihhlawhtlin a ni tawh. Kum 2026 chhungin pasarih, kum 2027 chhungin paruk, kum 2028-ah pathum, kum 2029-ah pakhat leh kum 2030 atan pathum a ni. DLI tihhlawhtlin vek a nih hunah ADB aṭanga loan pûk tur zawng zawng US dollar nuai 1,080 (cheng vbc 1,027 vel) hmuh kim a ni ang.

ADB aṭanga Mizoram sorkarin loan a pûk tur zawng zawng vbc 1,027 aṭang hian cheng vbc 103 chu Mizoram sorkarin a rulh tur a ni a, cheng vbc 924 chu sorkar laipuiin a rulhsak tur a ni thung.