North American box office-ah hun eng emaw chen thawm lian nei an awm loh hnuah film tlangzarh thar, 'Wicked' leh 'Gladiator-II' ten danglamna an rawn thlen. Film pahnihte hian USD mtd 270 dawn an la lut thei a ni.
Ariana Grande leh Cynthia Erivo-te channa, 'Wicket' chuan tlangzarh karah North America-ah USD mtd 114 la lutin, khawvel huapa a sum hmuh chhuah chu USD mtd 164.2 a tling nghal der. Broadway musical adaptation zingah tlangzarh kara sum la lut tam ber niin, kuminah tlangzarh kara sum la lut tam zingah a lang nghal bawk.
Ridley Scott-a'n kum 2000-a best picture a lakpuina chhunzawmna, 'Gladiator II' pawh a che ṭha hle. USD mtd 55.5 la lutin, he film-ah hian changtu thar Denzel Washington leh Paul Mescal te kan hmu. Film thawm nei lian pahnihte hi "Glicked" tiin an vuah sak leh nghal a, nikuma film lian pahnih 'Barbie' leh "Oppenheimer', 'Barbenheimer' tia sawi nen an khaikhin nghal a, mahse nikum lam erawh an pha lo hle. 'Wicked' entu tam ber hi hmeichhia an ni a, 'Gladiator-II' entu tam zawk erawh mipa an ni thung.
Dwayne "The Rock" Johnson leh Chris Evans te channa, action comedy 'Red One' chu No 3-ah awmin USD mtd 13.3 a hmuh belh leh. He film siamna atan hian USD mtd 250 zet sen a ni. Theatre lamah a flop hle a, mahse streaming lam aṭangin sum an la hmuh belh chhoh beisei a ni.
