Mizo film zinga nghahhlelhawm leh thawm nei lian tak, 'The Skys is Ours' chu zanin August 2, 2024 hian Vanapa Hall-ah release a ni ang. Zanin dar 9:30 aṭangin Zonet Empai Apps-ah en theiha chhawp chhuah a ni nghal bawk ang.
He film hi Wayward Production siam a ni a, Jeremy Hauhnar Director niin, Lalsangpuii Hnamte Executive Producer a ni a, Director of Photography atan Jon Mizo Visual hman a ni. Cast thar ṭha tak tak kan hmu dawn a, modelling lama hming lo chher tawh, Rinzuala, Christina Pachuau leh Kima Hmar te bakah Timothy Vanchhawng leh Mizo film Industry-a mikhual lo tak, Henry Hmangaihawma te'n role pawimawh an chang bawk.
Nikum November thla aṭangin an shoot ṭan a, Thailand lamah scene ṭhenkhat hi shoot a ni a, film score hi Leeds, UK-a sound designing zirlai, Sanglian Zadeng siam a ni. Trailer leh OST lama kan hmuh theih chinah he film hi hmuh nuam tak niin, set design mawi tak kan hmu dawn niin a lang a, Production Design khawihtu Vavoo Interior Design leh stylist, Andria Fanai te kutchhuak hmuh a chakawm tawh hle.
The Sky is ours hi contemporary romance (Love story) huang chhunga mi a ni a, Band lar tak 'The Hangout Boys'-a lead singer Zodina leh nuthlawi hmeltha, Betsie te inkara hmangaihna chungchang a ni. Mi pahnih kara inhmangaihna te, nun bul ṭan ṭha leh tura beihna te bakah, larna leh sum tam tak kara ṭhianho nunkawng zawh chhoh dan chanchin a tarlang a ni.
