Fak Zai khuhhawnna zaninah nei dawn

General PYD, Mizoram UPC buatsaiha Pentecost Fak Zai chu zaninah khuhhawnna neih a ni dawn a, Upa R. Vanlalruata, President, General PYD chuan a khuh hawng dawn a ni.

Pentecost Fak Zai khuhhawnna hi Mizoram UPC Conference Hall, Zonuamah neih a ni dawn a, zan dar 8:00-ah programme ṭanin, General PYD YouTube channel leh Zonet Bawhbelah live-a pekchhuah a ni ang.

Mal zai intihsiakna Pentecost Fak Zai hi kum 2022 khan a vawi khat nan neih lo ni tawhin, tun hi vawi hnih neih a nihna tur a ni a, online-in audition round hi neih a ni tawh a, zaninah Top 20-a tling puan a ni ang. Fak Zai khuhhawnnaah hian Fak Zai neih hmasaka top five aṭangin Michael CR Lalpianfela leh K. Lalnunpuii te an zai ang. Top 20 intihsiakna hi August 8 & 9 zanah neih tur a ni a, music track nena neih tur a ni. August 15 & 16-ah Top 10 intihsiakna neih a ni ang a, August 23-ah Top 5 inelna neih niin, August 30-ah Grand Finale nei tura ruahmanna siam a ni - Top 10 chin aṭang hian live music nen inelna kalpui tur a ni.

Pentecost Fak Zai intihsiaknaah hian Rev. Dr. Ngurthanpara Sailo, Upa F. Vanlalchama leh C. Lalmuanpuii te chu judge an ni ang a, Lalawmpuii leh Emilia Lalnunpuii te chu host an ni dawn thung.