Eras Tour-in zan khatah USD mtd 14 zel la lut pha

Tour aṭanga sum la lut tam ber, Guinness World Record chelh mektu, Taylor Swift 'Eras Tour' chu kum khat chuang tour a neih tawhah show vawi khatah USD mtd 14 zel la lut ang chhut a ni. Eras Tour hi kumin December thla hian a khar tawh dawn.

He tour aṭanga sum hmuh hi USD tld 2 dawn tling pha thei tura chhut a ni a, nikum kum tawpah khan USD tld 1 hi a hmu chhuak tawh a ni. Swift hmaa tour aṭanga sum la lut tam record siamtu chu Elton John niin, kum nga chhung 'Farewell Yellow Break' road tour a neih hmangin USD mtd 939 a la lut a ni. Eras Tour hmang hian Swift hian record eng emaw zat a lo siam chho tawh a, show vawi khata a sum hmuh hi chawhrualin USD mtd 14 zel anga chhut a ni. Show ṭhenkhatah chuan zan khatah USD mtd 17 an lak luh ṭumte a awm. Swift hian show vawi khat aṭanga sum la lut tam record siamtu, Beyonce 'Renaissance tour'-in show vawi khatah USD mtd 10.3 zel la lut anga chhut chu a rawn khum a ni.