Zonet Cablet TV-a programme thar, Zonet Arkaiden Zan chu zanin hian a hmasa ber atan hman ṭan a ni dawn.
Zanin dar 8-ah programme hi hman ṭan a ni dawn a, Zonet Zawlbuk, HD leh Empai Apps lamah live-a pek chhuah a ni ang. Zonet Arkaiden Zan hi thla tin hman a ni ṭhin dawn a, show director hi Danny Vanchhong a ni.
Tun ṭumah hian Mizo hmeichhe zinga mi bik, zai thiam, hla phuah thiam leh thu ziak thiam; Lalsangzuali Sailo pualin hun hman a ni dawn a, a hla phuah leh lo sak larte hmangin tunlaia kan zaithiam neih ṭhat tak takte'n hun an rawn hmang dawn a ni. Zai turte hi Kimkima, Guru Gee, David Darlong, Zothana, Zorinzuali Khiangte, Mary Dawngi leh Fawni te an ni. He hun atan hian zaithiamte pawh an inbuatsaih ngawrh hle.
Musician-te hi Asanga, Opa, Davida leh Sanga te an ni ang. Sound hi Wave Records & Sound Rental te niin, stage hi Mark Events lamin an buaipui thung.
Show hi tunlai show host kan neih ṭhat ber zinga mi, Zonuni Fanai in a kaihruai dawn a ni.
Mizo nu chhuanawm, Lalsangzuali Sailo hi kum 1949, May 15-ah a piang a, kum 2006, October 14 khan cancer natna avangin a boral. Hla hi 300 chuang a phuah hman a, Mizo ṭawng bakah Kokborok (Tripuri) leh English-in a phuah bawk. A hla phuah ṭhenkhat hi Class V - MA thlengin an zir a ni. AIR-ah hla 400 chuang a record bawk a, Grade A artist a ni. Zai thiam leh hla phuah thiam a nih bakah, thu ziak thiam niin lehkhabu 20 chuang leh booklet pathum a ziak bawk a, a lehkhabu zinga 'Tlawm ve lo Lalnu Ropuiliani' tih chu kum 1999 khan Mizo Academy of Letters chuan Book of the Year atan a thlang. Kum 1998-ah India sorkar chuan civil mi chawimawina sang, Padmi Shri a lo hlan tawh bawk.
