CK Hyundai buatsaih "Black Rose" film chu kar leh Zirtawpni zan hian Vanapa Hall ah tlangzarh a ni dawn ta.
Mittui a sur dawn
Black Rose ah hian Mizo nunphung, tunlai kan khawsakna leh changkanna milte pawt lutin, Love Story lam mittui ko chhuak thei tura duan a ni. He film ah hian hmangaihnain an beisei loh lam daiha pawh her an nih dan te lantir a ni dawn a, a changtunu khawvel buarchuar takin he film hi a thunun ang. Role pawimawh chang turin Mizo mipa model kan neih ṭhat berte zinga pahnih Timothy Vangchhia leh Mazualtea kan hmu dawn. A changtunu hi mi thar Nunui, Kawnpui khua niin Mizo film industry-ah hmelthar kan hmelhriat dawn a, film lamah sulhnu la hnutchhiah tam lo mah se, a changtute hian hnehsawh taka an role ṭheuh an chan chhuah avangin hmuh pawh a nuam hle tura ngaih a ni.
A phena mite an ṭha
Danny Vanchhong chuan script hi ziakin, director a ni nghal bawk. Mizorama videography lama kan chhuanvawrte zinga mi leh, film lama tawn hriat ngah tak BS Pictures kutchhuak a ni a, Melody G.Fanai (Tintin Entertainment) produce a ni. Hun eng emaw chen chu application-ah dah a ni rih dawn lo a, release a nih hnuah March 23 aṭangin AMC area bakah Mizoram hmun hrang hrangah chhuah a ni ang.
Ticket chan loh a awm thei
Film tlangzarh zanah hian ticket 300 bawr vel chauh siam a nih avangin lei hma a fuh mai thei. Ticket hi Kristie House of Beauty (Avon) Zarkawt leh, Fonn Inn Dawrpui Mahatma Gandhi lim bulah te lei theihin a awm a ni.
