Australia miin dementia neite pualin pull up vawi 8,008; World Record a siam

Kan kawng achin chunglam chak leh chak lohna tehna ṭha tak, pull up exercise hi kan hre fur awm e. Pull up ti thei tur chuan taksa a chak ṭhat a ngai hle a, regular taka exercise la ṭhinte pawhin exercise dang zawng aia an huphurh chu pull up hi a nih ngei a rinawm.

Australian fitness fanatic, Jaxon Italiano chuan dementia vanga harsatna tawk mekte puala sumtuakna atan, darkar 24 chhungin pull up vawi 8,008 tehmeuh zuk han ti thei a!

Jaxon Italiano chuan pull up ti hnem ber Guiness World Record a siam bakah, a thiltih kaltlang hian dementia natna nei mi nuai 4 chuang a ṭanpui bawk a, lungte pakhatin sava pahnih a vawm thla a nih ber mai chu.

Italiano chuan a fundraising page kaltlangin, "Pull up vawi khat ka tih apiangin USD 1 hmuh ka tum a, mahse, in ṭanpuina ka mamawh a ni. Dementia natna hneh tuma ka beihna kawngah hian khawngaih takin ṭanpuina rawn thawh ve turin ka dil che u a ni. Heng aṭanga kan sum hmuhte hi Dementia Australia hnenah hlan an ni dawn a, anni hian dementia vei mekte, an chhungte leh, enkawltute a pui dawn a ni," a ti.

Guinness World Records website chuan Italiano hian taksa hliam, rilru tawt leh rhabdomyolysis a paltlang avangin he a mellung siam hi a tihlu zual bik hle tih a tarlang. He natna hian thihna hial emaw rualbanloin emaw mi a siam thei a ni, tiin a thiltih hi a namai loh zia an sawi.