Spotify-a girl group zinga stream hlawh ber BLACKPINK

South Korean chhulchhuak ṭha mi, Blackpink chu girl group zingah Spotify-a stream hlawh ber an nih thu official-a puan an ni ta.

Member pali awmna band hian March 8 thleng khan stream tluklehdingawn 8.8 chuang an nei tawh a, a hmaa record lo chelhtu British girl group, Little Mix chu stream maktaduai 400 zetin an khum niin Guiness World records chuan a tarlang.

Blackpink hian chanchin duhawm an nei chho mawlh mawlh a ni deuh ber. Tun kar tir khan, Jisoo chuan a debut solo "ME." tih chu March 31 hian a tlangzarh tur thu a puang a, Jisoo hi Blackpink member zinga solo debut tichhuak hnuhnung ber a ni ang.

Lisa chuan September 2021 khan a solo debut "Lalisa" chu a tichhuak a, Rosé chuan March 2021-ah "R" tichhuakin, kum 2018 khan Jennie chuan "SOLO" tih hla chu a lo tichhuak tawh bawk a ni.

Blackpink label-YG Entertainment chuan thla hmasa khan Jisoo debut solo hi Blackpink video chhuak tawh zingah production cost hautak ber a nih thu an puang a, eng angin nge a rawn chhuah dawn tih hriat a chakawm tawh hle.

Blackpink hian BORN PINK world tour neiin Asia leh ram hrang hrang an fang kual mek a ni.