Rihanna chuan Climate Justice pawl hrang hrang hnenah climate change an dona kawnga hma an lakna turin a Clara Lionel Foundation kaltlangin $maktaduai 15 lai mai a pe.

'Umbrella' hitmaker hian Thawhlehni khan hemi chungchang hi a puangzar a, climate justice pawl 18 insem turin pawisa hi a pe tih sawiin, Caribbean ram pasarih leh United States-a sik leh sa inthlak danglam zel dona kawnga hmalatu pawlte hnenah sum tam tham tak hi a theh chhuak a ni. Chung pawl hrang hrang zingah chuan Climate Justice Alliance, Indigenous Environmental Network, leh Movement for Black Lives-te pawh an tel niin Associated Press chuan a tarlang.

Barbadian singer kum 33 mi chuan,"Sik leh sa inthlak danglamin chhiatna a thlen chuan community hrang hrang a nghawng dan a inang lo a, 'communities of color' leh thliarkara cheng ramte chu a nghawng nat zual an ni," tiin thuchhuah a siamah a tarlang a ni.

Rihanna hian thil ṭha tihna kawngah hian a sum tam tak a lo thehchhuak fo tawh. Kum 2020-a hrileng vanga khawvel nasa taka a buai lai khan Twitter co-founder Jack Dorsey nen thawkdunin $mtd 15 vel zet chu mental-health service atan an lo thawh tawh a, Los Angeles-a tharum thawhna tuartute tan $mtd 2.1 ve ve an lo pe tawh bawk.

Nikum lamah khan Forbes magazine chuan Rihanna hi billionaire a nih tawh thu an puang a, a hausak zawng chu $tluklehdingdawn 1.7 vel zet niin an tarlang. A sum lakluhna ber chu a cosmetic company Fenty Beauty aṭangin a ni a, he company aṭang hian $tld 1.4 vel zet sum a lalut niin an chhut. A lingerie brand bakah lemchan leh rimawi aṭanga a lakluh chu $mtd 270 vel niin an chhut bawk a ni.