Hla 13 chiah maw?

Tun kum zabi kan hman mekah hian, hla 13 chiah No. 1 Billboard Hot 100 Hits Co-Writer tel loa phuah a awm!

Ṭhalaite rimawi khawvelah hian Taylor Swift hming a rik tel chuan a lian lo thei lo. L.A. Times-in Blur leh Gorillaz frontman Damon Albarn-a interview-naah Albarn chuan Taylor Swift chu mahnia hla phuah ngai loah a puh a, chu chu Swift hian na takin a chhanglet nghal a nih kha. Chu chuan ngaihven a hlawh a, entertainment media-te chaw tui ber a ni nghal.

Hetiang boruak karah hian Billboard lam chuan an single chart ngaihhlut Hot 100 chart data an rawn tarlang nghal thuai mai. Chumi aṭanga a lan dan chuan kan kum zabi hman mekah hian hla 13 chiah No. 1 Billboard Hot 100 Hits Co-Writer tel loa phuah a awm! A bak zawng chu phuah puitu (Co-writer) awm vek a ni.

Kum zabi 21-naah hian hla 283 lai mai chu Billboard Hot 100 No.1 hla a awm tawh a, chung zinga 13 chiah chu co-writer tel loa phuah a ni. Kum 10 liam ta chhung khan top 10-a lang hla 540 awm bawkin chung zinga 25, 5% aia tam hret chiah chu co-writer tel loa phuah a ni ve bawk.

J.Cole chu co-writer tel loa a hla phuah Hot 100 top 10-a lanpui tam ber a ni a, pali a lanpui. Hla pathum lanpui thei pahnih an awm a, pakhat chu Twenty One Pilots member Tyler Joseph niin a dang leh chu tudang ni loin Taylor Swift hi a ni.

Tunkar Hot 100 chart-ah khan hla pakua chiah co-writer tel loa phuah a awm bawk.