Mortal Kombat chhunzawmna buaipui mek

Warner Bros. leh New Line Cinema chuan nikuma an tlangzarh Mortal Kombat film chhunzawmna chu an buaipui lek mek a, hma an la ṭan leh tawh.

Disney Plus Marvel series thar tur, mi tam takin an nghahhleh 'Moon Knight' screenwriter Jeremy Slater chuan Mortal Kombat chhunzawmna script chu a ziak dawn niin khawthlang lam media-te chuan an tarlang. Warner Bros, leh New Line Cinema-te hian thuchhuah siam chiah lo mah se Mortal Kombat chhunzawmna siam tur hian hma an la reng niin Variety chuan a tarlang a, Slater an biakfel hnuah hian official-in hma an la tih chu an tichhiang chauh niin an tarlang bawk.

Mortal Kombat chhunzawmna chungchang hi chiang taka tarlan a la tam lo. Nikum April thlaa HBO Max-a Mortal Kombat reboot tlangzarh a nih khan film review-tu lam ngaihdan a inlang lo hle a, ṭhenkhatin an fak viau laiin ṭhenkhat erawh chuan an sel nasa viau a nih kha. Khati chung khan a hlawhtling a, $mtd 55 vel senga an siam niin hripui leng karah North America Box Office aṭangin $mtd 42 lai chu a hmu chhuak tho a, khawvel puma a sum lakluh phei chu $mtd 83 lai a ni.