'I'd Do Anything for Love' singer Meat Loaf chu an ram huna Ningani zanah khan kum 74 mi niin a thi a, a thih chhan tarlan a la ni lo.
Grammy hial pawh dawng tawh, a hming tak Marvin Lee Aday thih thu hi a official Facebook Page-ah nimin khan puanzar a ni.
"Thinglung na chungin mibik Meat Loaf chu zanin khan a nupui Deborah a kianga a awm laiin a kal ta tih kan puang e. Darkar 24 liam ta chhung khan a fanu Pearl leh Amanda-te bakah a ṭhian hnaite'n an awmpui reng a ni...
"Mi tam tak tana a hlutna kan hriain, he hun khirh tak mihring ṭha tak leh artist, midangte tiphur ṭhin kan sun laia min hmangaihna leh min thlawpna hi kan lawm hle. Privacy kan mamawhna min hriatthiampui avang pawhin lawmthu kan sawi. A thinlung aṭanga in thinlung thlengin... rock titawp ngai suh u!" tiin a Facebook Page-ah an puangzar.
Khawvela zaithiam hlawhtling ber zinga mi a ni
Meat Loaf hi khawvela artist hlawhtling ber pawl a ni a, a album 'Bat Out of Hell' phei chu US history-a album hralh kal zual 35 zingah a tel phak a, copy mataduai 14 vel zet a hralh a ni.
A single pahnih 'Two of Three Ain’t Bad' leh 'Paradise by the Dashboard Light'-te chu Billboard Hot 100-ah 11-na leh 36-nate a nihpui phak a, heng hla pahnihte hi kum 2018 khan RIAA chuan platinum-ah a puang nghe nghe.
'Bat Out of Hell' hi trilogy angin a tichhuak a, 'Bat Out of Hell', 'Bat Out of Hell II: Back into Hell', leh 'Bat Out of Hell III: The Monster Is Loose' te tichhuakin khawvel ram hrang hrangah copy maktaduai 65 chuang a hralh. Heng album a tihchhuah aṭang hian kum 40 chuang liam tawh mah se kumtinin copy nuai hnih vel lai chu a la hralh ziah angin an chhut!
Lemchan lamah pawh
Texas khaw chhuak zaithiam Meat Loaf hian lemchan lamah pawh sulhnu a hnutchhiah nual a, kum 1975-a 'The Rocky Horror Picture Show' chu a lemchanna zingah chuan a larpui ber a ni awm e. Spice Girls movie 'Spice World', kum 1997-a tihchhuahah pawh khan a inlan a, 'Fight Club' leh 'Wayne’s World'-ahte pawh a inlan bawk. Kum 1962 leh 2004 inkarah khan film 50 chuang tehmeuhah a inlan!
- Studio album 12 a tichhuak hman.
- Kum 2016 khan a album hnuhnung ber 'Braver Than We Are' chu a tichhuak a ni.
- Ram hrang hrangah record maktaduai 80 chuang a hralh.
- Evanescence dintu pahnih - Ben Moody leh Amy Lee-te an intawn khan Amy Lee chuan Meat Loaf hla 'I'd Do Anything for Love' piano-in a lo play a ni.
