Mystical Mizoram Ṭhazual Lengzem Chart-ah Jaui chuan a hla thar ber 'Min hmangaih rawh' hmangin ro a rel a, Apuii Chhangte leh JT Production chu pahnihna leh pathumna an ni.
Chart topper 'Min hmangaih rawh'
'Min hmangaih rawh' hi Jaui hla thar ber a ni a, thla hnih vel liam taah khan tichhuakin a hla dangah pawh a thawhpui ṭhin Hmachhuana Khiangte phuah bawk a ni.
He hla avang hian Ṭhazual Award hmanni lawka semah khan Hmachhuana Khiangte hian Best Songwriter Lengzem award a dawng nghe nghe.
"A thunawnah 'I Par zu ka dawnin' a tih hi inngaihzawnna leh nupa inkarah pawh a niang chu, kan duh berte nena, a nuam emaw a hreawm emaw pawh nise, huaisen taka kan tuar chhuah theihna hi a lo thlum(sweet) ber. Chu chuan a kawppui kha chhuang tak leh hmasawn zel tura duhsak chungin, amah theihnghilh mai loa vul zel tur leh hmangaih reng tura a ngenna hla a ni," tiin Jaui chuan he hla a tihchhuah tirh khan a hla chungchang hi a lo sawi tawh a, tunah chuan chart topper hial a ni ta a ni.
Jaui zai thiam zia kan hria, sawi nawn a ngai lo. Music video hmuh nuam tak nen he hla hi a rawn tichhuak a, chart topper a ni pawh hi a phu hle a ni.
Pahnihna Apuii Chhangte, pathumna JT Production
Apuii Chhangte hla mawi tak leh hlathu dangdai tak 'Hmeichhia' chu pahnihna a ni a, Lengzem singer mipa zinga huhang ngah ber pawl JT Production chu pathumna ni thungin a hla 'Ka ngai em che' chu top 3-ah a inhlankaipui a ni.
Chart-a hla lang ho a mawi
Zaii Hauchhum hla hit leh mawi tak mai 'Ka u Liandova' chu palina a ni a, Shin Bia 'Khuavang note' chu pangana a ni thung.
MYC star Lalhmangaihzuali (Nunui), Jenny Jathang, Kimkima, David Zawma leh Rebecca Lallawmsangi-te pawh chart-ah hian an lang a ni.
Ṭhazual Lengzem Chart top 10:-
1 Jaui Min hmangaih rawh
2 Apuii Chhangte Hmeichhia
3 JT Production Ka ngai em che
4 Zaii Hauchhum Ka u Liandova
5 Shin Bia Khuavang note
6 Lalhmangaihzuali (Nunui) Nangnen chuan
7 Jenny Jathang Kan thawnthu
8 Kimkima Hmangaihna rimawi
9 David Zawma Partin lawr
10 Rebecca Lallawmsangi Zinkawng
