Hontrade International Ṭhazual Fakna chart-a No.1 vawi eng emaw zat lo hauh tawh, Grace Lalchhanhimi chuan dinhmun sang ber a rawn luah leh ta.
Mizo Idol 2014 Grace-i hian September thla khan music video thar 'Rinna mitin ka thlir ṭhin' tih chu a release a, he hla hmang hian pakhatna hi a rawn hauh ta a ni. Dinhmun sang ber luah tur hian thla khat vel awrh chauh a mamawh a, a zai ngainatu an tam tih a lang.
'Rinna mitin ka thlir ṭhin' tih hla hi Rev. Zoramsanga lehlin niin, music leh recording hi Blue Wave Record kutchhuak a ni. Video hi Siama (SVP) siam sak a ni thung. Kolasib nula Grace Lalchhanhimi hian kumin music video pakhat a tihchhuahna chauh a la ni a, heti chung hian a hlawhtling hle a ni.
Tun ṭum chart-ah hian Amtea chuan 'Engkim ka hlan a che' tih hla hmangin pahnihna a hauh a, Stacy V.L. Muanpuii chu pathumna a ni. Tun hnaia music video thar nena rawn inlar Stacy hian chart-ah a dinhmun a sawh nghet mek a, hma pawh a sawn chak hle. Stacy hian top 10-a lang phak hla pahnih a nei mek a, tun hnaia a tihchhuah 'Thlen ka nghakhlel' tih chu pakuana a ni.
Ṭhazual chart-a mikhual lo tak Hlimhlimi chuan 'Min pui ang che' tih hla hmangin palina a hauh a, Jennie Lalruatfeli chu top 5-ah a lang bawk.
Henry Varte pawh a hla thar 'A sawm che' tih hla nen chart-ah a inlar mek a, PC Vanlalhriati (Tenu-i) hmel hmuh tur a awm leh bawk. Saitual nula Tenu-i hian 'Ka hria a sin' tih hla hmangin hun eng emaw chen chu top chart-ah dinhmun sang a luah tawh a, tun ṭumah pawh pasarihna a rawn hauh leh thei a ni.
Top 10-ah hian C. Vanlalduati leh Sawmtea Chhangte te chu an lang bawk. Sawmtea hian tun hnai khan music video thar 'Ka awin Pathian chu ka au va' tih chu a release a, top chart-ah a rawn inlar nghal thei a ni.
Hontrade International Ṭhazual Fakna Top 10
1. Grace Lalchhanhimi - Rinin ka thlir thin
2. Amtea - Engkim ka hlan a che
3. Stacy V.L. Muanpuii - Kan hneh zel dawn
4. Hlimhlimi - Min pui ang che
5. Jennie Lalruatfeli - Thuneihna I ta
6. Henry Varte - A sawm che
7. PC Vanlalhriati (Tenu-i) - Ka hria a sin
8. C. Vanlalduati - Tui chungah
9. Stacy V.L. Muanpuii - Thlen ka nghakhlel
10. Sawmtea - Ka awin Pathian chu ka au va
