Rio Ferdinand leh Kate Wright an inhual
A hun laia footballer hriat hlawh tak Rio Ferdinand leh TOWIE star Kate Wright te chuan an inhual thu an puang. Rio leh Kate hian Abu Dhabi-ah chawlh an hmang a, he hmunah hian an inhual ta a ni.
Manchester United defender hlui Ferdinand leh Kate Wright te hi nikum aṭang khan an inzui ṭan a, thla tam pawh rial loin an inhual zui ta a ni. Ferdinand hi kum 39 mi lai a ni ve tawh a, fa pawh pathum a nei tawh a ni. Hetih lai hian Kate erawh kum 27 mi chauh a la ni thung a ni.
England kulhbing ni ṭhin Ferdinand hi Rebecca Ellison nen 2009 khan an innei a, mahse cancer natna avangin Rebecca hi 2015 khan a a boral a ni. A thih hian kum 34 mi chauh a la ni a, Ferdinand nen hian fa pathum - Lorenz (12), Tate (10) leh Tia (7) te an nei hman a ni.