MTV EMA 2018 Camila Cabello a ropui ber
MTV Europe Music Award chu Thawhṭanni zing khan sem a ni ta a, American-Cuban singer Camila Cabello a langsar ber. Cabello hian award 15 zinga pali a hui a, chawimawina a dawng hnem ber a ni.
MTV EMA 2018 hi Bilbao Exhibition Center, Spain-ah neih a ni a, American actress Hailee Steinfeld chuan a host a ni. Award ceremony-ah hian milar tak tak an fuan khawm a, hlut a hlawh hle a ni. TV lam aṭanga lo thlirtu pawh an ṭhahnem hle.
Camila Cabello chu a tir phat aṭanga boruak nei lian ber niin, category paruk-ah a hming a lang. Chung zinga pali-ah chuan winner niin, award ngaihlut tak tak a hum haw a ni.
Chung zingah chuan 'Best Artist' pawh telin, Young Thug nena an sakdun 'Havana' chuan award pahnih a hlawh chhuak bawk. Hei bakah hian Best U.S Act pawh a la tel cheu a ni.
Ariana Grande leh Post Malone te chu category panga ve ve-ah an lang a, award dawng zingah erawh an lang lo thung. Hetih lai hian English singer Dua Lipa chu Best Pop Artist atan thlan a ni a, Cardi B chuan Best New Artist a dawng a ni.
Nicki Minaj chuan award pahnih a hum haw a, Canadian singer Shawn Mendes chu Best Live Artist chawimawina hlan a ni. Best Rock Artist chu 5 Seconds of Summer niin, Best Alternative Artist award chu Panic! At The Disco ten an dawng a ni.
Electronic Dance Music (EDM) lamah American music producer Marshmello a langsar a, Best Electronic Artist atan thlan a ni. Award sem a nih tawh chuan Korean boy band BTS hming a lang deuh ziah ṭhin a, tun ṭumah pawh Biggest Fans award hlan an ni.
MTV EMA-ah hian zaithiam eng emaw zat an perform a, chung zingah chuan Janet Jackson pawh a tel. Ani bakah hian - Alessia Cara, Bebe Rexha, Halsey, Little Mix, Nicki Minaj leh Panic! at the Disco te chu an inlan bawk. Jackson kutah hian Global Icon Award hlan a ni bawk.
MTV EMA 2018 Winner
Best Artist : Camila Cabello
Best Pop Artist : Dua Lipa
Best New Artist : Cardi B
Best Hip-Hop Artist : Nicki Minaj
Best Live Artist : Shawn Mendes
Best Rock Artist : 5 Seconds of Summer
Best Alternative Artist : Panic! At The Disco
Best Electronic Artist : Marshmello
Biggest Fans : BTS