Sorkar laipui chuan Citizenship Amendment Act (CAA) hmangin mi 300 chuang hnenah India khua leh tui nihna a pek thu a puang. Union home secretary, Ajay Kumar Bhalla chuan mi 14 hnenah khua leh tui nihna certificate hi a hlan a ni.

Ministry of Home Affairs (MHA) thuchhuaha tarlan a nih danin, khua leh tui nihna certificate hlan mi 14-te hi kum 2013-a Pakistan aṭanga lo kalte an ni a, certificate hi Delhi-ah hlan an ni. Khua leh tui nihna pek zawng zawngte chawr chhuahna ram hi tarlan ni lo mah se, a tam zawk hi Pakistan aṭanga Hindu lo kalte an ni. Certificate hlanna hunah hian Bhalla hian CAA ṭhatna leh a hnuaia dan pawimawh bikte a sawi lang bawk.

CAA kaltlanga India khua leh tui nihna dilnate hi en dik leh en fiah vek a nih hnuah ram chhung hmun hrang hrangah post office kaltlanga thawn an ni a, Pakistan-a Hindu sakhaw zuitu India rama lo lutte hi a tam zawk chu Gujarat, Chhattisgarh, Rajasthan, Haryana, Punjab leh Delhi-ah te an khawsa hlawm a ni.

March 11 khan MHA chuan CAA dan a zamte tlangzarhin hman ṭan nghal a nih tur thu a tichhuak tawh a, India khua leh tui nihna dil turte tana document ngai hrang hrang leh a dil dan turte pawh tarlan tel a ni bawk. CAA hnuaia dan zamah hian khua leh tui nihna pek tura thutlukna siam thei chu Census Operation director a ni a, online-a dilna lo en fiah erawh department of post official-te kaihhruaina hnuaia dictrict level committee kuta dah a ni thung. Sorkar thuchhuaha tarlan a nih danin online-a India khua leh tuina nihna diltu hi mi 25,000 an chuang tawh a ni.