PoK hi kan la let leh ang : Amit Shah

Union home minister Amit Shah chuan Pakistan occupied Kashmir (PoK) chu India rama tel, India ram ngei a nih thu sawiin, PoK ral lehlama awmte chuan zalenna an duh thu an au chhuahpui reng a ni, a ti.

Amit Shah hian West Bengal-a Hooghly district-a Sreerampore-a election rally-ah thu sawiin, Congress leh Trinamool Congress hruaitute chu Jammu & Kashmir inhungbikna, article 370 ṭhiah thlawp loah puhin,"Mamata leh Rahul Gandhi te hian Pakistan hi an hlau a ni. Kei chuan PoK hi India ram a ni ka ti a, kan la let bawk ang," tiin a sawi. "Tun hma chuan Kashmir hi a buai reng a, tunah chuan PoK hi a buai tawh zawk a ni. India-ah zalenna duhin an au a, tunah chuan PoK-ah zalen duhin an au ve leh thung a ni," tiin Amit Shah chuan Kashmir chu a ralmuan tawh thu leh, khualzin pawh vbc. 2 chuang an awm tawh thu a sawi bawk.

Sreerampore-a election rally neihnaah hian Amit Shah hian TMC chu bei zuiin, eirukna leh mipui bumna chi hrang hrang kalpuiah a puh a, CAA ṭhatna sawi langin, Narendra Modi an thlawp chuan dan loa lo lut ru ni loin, dan anga khua leh tui nihna petu an thlawp dawn a ni, a ti.