PM Modi-a'n Nashik a tlawh dawn avangin loneitu 50 chuang hreng

Prime minister Narendra Modi-a'n May 15-a Nashik a tlawh tur denchhena loneitu ṭhenkhat leh eptu party ṭangrual pawl, Maha Vikas Aghadi mi leh sate'n nawrh huaihawt an tum avangin loneitu mi 50 chu police-in an hreng. Police-in loneitu an mante hi purunsen chingtute an ni.

Loneitu leh eptu party-te hian sorkar laipuiin kum liam ta chhunga ram pawna purunsen thawn chhuahna man siam chungchanga mu leh mal a nei lo lutuk chu an lungawi loh thu an sawi a ni. Loneitu pawl hotu, Bharat Dighole chuan sorkar laipuiin purunsen thawn chhuah dan chungchanga August 2023 aṭang ringawt pawha chhiah chawi tur a tidanglam zing lutuk leh, khapna siama, siam leh lo anga a kal chho chu an tan a luhaithlak thu a sawi. An harsatna tawhte chu media lamin an ngaihsak tawk loh thu leh, PM Modi emaw, Sharad Pawar emaw, Thackeray emaw pawhin anni chu an ngaihsak loh thu a sawi a ni. Nashik police-in an hren loneitute hi May 15 zing dar 7 khan man an ni a, tlai lam dar 5 hnu lamah chhuah an ni leh chauh a ni.

Maharashtra-ah hian purunsen thar ṭhin loneitu, Maharashtra Rajya Kanda Utpadak Shetkari Sanghatana (Maharashtra State Onion Producers Association)-a inziak lut ringawt pawh nuai thum chuang an awm a, an hruaitu Dighole hian ram 50 chuangah purunsen an thawn thu a tarlang tel bawk.