Delhi-a Patiala Court House court chuan nimin khan Rashtriya Janata Dal (RJD) hotu Lalu Prasad Yadav-an India Railway Catering and Tourism Corporation (IRCTC) scam case-a interim bail a dilna chu a phalsak.
Bihar chief minister hlui Lalu Prasad Yadav hi chief minsiter a nih laia ranchaw man tihchingpen thubuaia thiam loh chantir niin jail-ah a tang mek a ni. Hei baka hian union railway minister a nih laia IRCTC hotel pahnih siamna tur contract chu dik lo taka private firm hnena pea puhin thubuai siamsak a ni bawk. He thubuai-a interim bail a dilna chu nimin khan Patiala House Court chuan a ngaihtuah a, a dilna ngaihtuahna hmunah hian Lalu Prasad hi a hriselna ṭhat tawk loh chhuanlamin a inlan lo a, Ranchi-a a tanna jail aṭangin video conference hmagin a inlan a ni. Nimin vek khan he thubuaiah hian Bihar CM hlui leh Lalu Prasad-a nupui Rabri Devi leh an fapa Tejashwi Yadav te pawh court-ah hian an inlan bawk.
Enforcement Directorate (ED) chuan IRCTC scam chungchanga thubuai a ziahluhah RJD hotu bakah a nupui Rabri Devi, an fapa Tejashwi Yadav leh midangte hming a tarlang a, April thlak han Central Bureau of Investigation (CBI) pawhin chargesheet thehlut ve lehin Lalu, Rabri, Tejashwi leh midangte dik lo taka thil an tih dan finfiahna ṭha tak pawh a awm niin an sawi a ni.
December 11 khan Lalu hian ranchaw man chingpen thubuai pathumah a kum upat leh hriselna ṭhat loh avangin bail-a chhuah a lo dil tawh bawk. Heng thubuaia bail a dilna hi Jharkhand High Court-ah a thehlut a, mahse ngaihtuahsak a la ni lo.
