Union minister hluiin eptu ṭangrual pawl zawm dawn

Union minister aṭanga bang ta, Upendra Kushwaha chuan BJP kaihhruai National Democratic Alliance (NDA) a chhuahsan hnuah eptu ṭangrual pawl, grand alliance a zawm dawn.

Bihar-a Rashtriya Lok Samta Party (RLSP) hotu Kushwaha hian NDA a chhuahsan hnuah eptu ṭangrual pawl zawm a hreh loh thu hi a lo sawilang tawh a, nimin khan RJD hotu Tejashwi Yadav leh Congress hruaitu Sadanand Singh-te nen press conference neiin eptu ṭangrual pawl a zawm thu hi a puang ta a ni.

Kushwaha chuan grand alliance zawm a hreh loh thu a sawinaah, Congress president Rahul Gandhi chuan hma a sawn thu leh, hruaitu puitling tak a nih chhoh thu a sawi a, nakkuma Prime Minister atana Narendra Modi thlak theitu tur a nih thute a sawilang a ni. A chhuahsan tak BJP kaihruai NDA chu sawizuiin, NDA chu an inluling sawtin midang an chaldelh tawh a, hei vang hian an lak aṭang inlakhran chu a duh ta niin a sawi.

RLSP hian Parliament-ah member pathum a nei a, Bihar-a BJP leh JDU-te nena an thawhhonaah nakkum Lok Sabha inthlanpui neih tura seat an sem danah lungawi loin, December 10 khan NDA hi an chhuahsan a ni. Kushwaha hian PM Modi hnena banna lehkha a thehluhah, council of minister-a thla 55 a awm chhunga a kaihhruai danah an lawm loh thu a sawi a, inthlan hmaa mipuite hnenah a thil lo tiam leh thuneihna an chan hnua a thiltihte chu a in ang lo hle tih a sawi a ni.