Voter paih chungchangah Delhi CM leh union minister inchhang

Delhi electoral list aṭanga voter tam tak paih an nih chungchangah Delhi Chief Minister leh Aam Aadmi Party (AAP) convener Arvind Kejriwal leh Union minister Vijay Goel te chu twitter lamah an inchhang.

Delhi CM chuan BJP thupek angin voter list aṭang hian Purvanchalis leh sumdawng eng emaw paih an ni tih a sawi a, hei hi Goel chuan rang taka chhang letin Arvind Kejriwal-a kaihhruai sorkar dawtsawi chu vote tam tak paih a nih aṭangin hailan a ni ta niin a sawi ve thung.

Goel chuan twitter-ah, "Arvind Kejriwal-a sorkar dawt sawi chu hailan a ni ta. Delhi mipuite dawt a hrilh hi titawp rawh se. Chief Electoral report aṭangin list aṭanga paihte chu mitthi tawh leh hmun danga awm tawhte an ni. Voter list hi case data anga kalpui a ni lo", tiin a ziak.

AAP hotu hian a chhang ve leh nghal a, "Election Commission kan nawr luih avangin voter paih tak hming list hi kan nei a, list an siam behchhana sawi kan ni. Nangni pawh voter paih takte hming hi in kawl vek a, list-a Puravanchalis leh Banias hming awm zat kha han chhiar teh u", tiin a cho let ve thung.

Kejriwal chuan kum 2015-a Delhi assembly inthlan neih a nih hnu aṭang khan BJP hian voter nuai 30 chuang a paihtir tawh niin a puh a ni. Heng voter paih zinga a tam ber chu Purvanchali leh Bania hnam an ni tih a sawi bawk.