Indian Air Force (IAF) official-te chuan sorkar laipuiin indo thlawhtheihna, jet fighter 200 lei a tum thu an sawi. Mahse heng jet fighter-te hi India ram chhunga siam an ni tur a ni, an ti.

India rama siam, single engine thlawhtheihna 200 lei a tum hi sorkar duh dan anga siam a nih chuan 300 thleng pawh a lei belh duh mai thei niin official-te cuan an sawi. Heng hi IAF-te'n an hman mek, Soviet Union hunlaia siam indo thlawhtheihna thlakna atan hman an ni ang.

Sorkar laipui chuan September thla khan France company, Dassault siam Rafale indo thlawhtheihna 36 lei tura inremna an lo siam tawh chu a sut a, hei vang hian IAF hian indo thlawhtheihna a mamawh hle. China leh Pakistan hmachhawn tura indo thlawhtheihna a mamawh zat hmun thuma ṭhena hmun khat chauh a nei mek a ni.

Air officer chuan indo thlawhtheihna chu a tlem berah 200 tal mamawh belh a nih thu a sawi. Mahse sorkar laipui chuan thlawhtheihnate hi ramchhunga siam leh, ramchhunga company inbunte nena tih ho a nih loh chuan, a man a sang dawn lutuk niin a sawi. Hei vang hian defence ministry chuan company hrang hrang hnenah, India ramah single-engine jet fighter siam tura an inbun theih dawn leh dawn loh a zawt tawh bawk.

Hetihlai hian IAF chuan surgical strike neihnaa hman theih turin Israel siam, Searcher leh Heron Unmanned Aerial Vehicle (UAV) chu missile nena thuam a tum. Hemi atan hian cheng vaibelchhe 10,000 vel a ngaih rin a ni a, IAF chuan Israel defence major Israeli Aircraft Industry (IAI) chu thawhpui dan kawng a zawng mek. He hna hi Project Cheetah programme hnuaiah kalpui a ni ang.