Kerala-ah khawlai ui that hnem ber gold coin pe dawn

Kerala sorkarin an state chhunga khawlai ui tihrem tuma hma a lak tur thu a sawi hnuah, Pala-a ST Thomas College Old Students Welfare Association chuan civic body zinga khawlai ui tihlum hnem ber hnenah gold coin an pek tur thu a sawi. Hei hian December 10 thleng a huam ang.

Kerala-ah hian khawlai ui-in an beih avangin thla li chhungin mi pali in an thih phah a, mi 700 in hliam an tuar bawk. Hei bakah hian ui seh avanga kumin chhunga sorkar damdawi-ina in entir chu mi 53,000 an awm tawh bawk. Hei vang hian khawlai ui tihrem tum hian sorkar chuan hma lak a tum a ni. Sorkar hmalakna puihna kawng khat atan, college alumni association hian khawlai ui tihlum hnem ber panchayat leh municpality hotute chu lawmmawn hi an pek tur thu a puang a ni.

Association General Secretary James Pambaykkal chuan gold coin an pek tur hi association member 1,200 ten an thawhkhawm aṭangin an siam dawn tih a sawi a, coin rih zawng chu an sum hmuh dan a zira siam a ni ang, a ti. Civic authority-te chuan hun tiam chhung hian nikhata khawlai ui an tihhlum zat report an thehluh a ngai dawn tih a sawi bawk.