Ramchhung Lawrkhawm
J&K-ah school hal
Jammu and Kashmir-a Anantnag district-a central sorkar hnuaia mi, Jawahar Navodaya Vidyalaya chu nimin khan misualten an hal. J&K-a tualchhung buaina a thlen hnu hian school 25 hal an ni tawh.
Tualchhung buaina a chhuah hnua school halte sorkar school deuh vek an ni a, haltute hi hriat an ni ngai lo. Nimina school hal hi an hriat hma avangin thil a tihchhiat nasat hmain an ṭhelh mit hman a ni.
Kashmir valley-ah hian tualchhung buaina a thlen hnuah ni 112 chhung chu school hrang hrangte class an la tawh lo a, buaina chhuak vang hian mi 92 an thi tawh a, mi sang telin hliam an tuar bawk. School te hi khar chhunzawm reng ni mah se, state sorkawr chuan dan pangngai angin November thla tawpah exam buatsaih a ni dawn tho tih a sawi a, mahse zirlaite chuan exam hun hi nakkum March thlaah sawn hla turin an phut thung.
Kupwara-ah firfiak leh sipaite inkap
Jammu and Kashmir-a Kupwara ramhnuaiah nimin khan firfiak leh security force-te an inkap.
Security force-te hian Kupwara-ah firfiak pathum an awm thu an dawn bawhzuiin, nimin zing khan forest area an dap nghal a, firfiakte nen hian an inkap zui a ni. Nimin chawhnu lam thleng khan an la inkap a ni. Kupwara ramhnuaia kalte hi armed force, CRPf leh J&K police joint team an ni.
Inrinni zan khan Jammu district-a RS Pura sector-a International Border (IB)-a ram pahnihte inkahhai an puan chu Pakistan Rangers-te chuan bawhchhiain, India an bei leh. Ramri vengtu, Border Security Force (BSF) te chuan an chhang let ve nghal a ni.
SBI customer nuai 6-te debit card thar pe dawn
Malware infection-in debit card ṭhenkhatah harsatna a thlen avangin State Bank of India (SBI) chuan customer nuai ruk chuang hnenah debit card thar a pe dawn.
Non-SBI ATM network-ah malware infection-in October 19-a buaina a thlen avang khan SBI chuan an security lam venthawn thilah debit card nuai ruk chuang hi a block sak nghal a ni. He buaina thleng vang hian bank hrang hrang 19 chuan debit card nuai 32 an block a, bank ṭhenkhat chuan block loin customer-te hnenah ATM PIN thlak nghal turin a hriattir bawk.
SBI pawh hian a tirah chuan debit card hi a block sak mai lo a, mahse customer tam zakwin an PIN an thlak loh avangin a block sak ta a ni.