US president Donald Trump chuan Capitol Building-a Congress session neih lai ti buaitute chu a dem tih a sawi. 

Session neih laia buaina thlentute chu amah thlawptute ni mah se Trump chuan America democracy tibawlhhlawhtute an nih thu a sawi a, thihna hial a thlen avangin Trump chuan buaina siamtute chu America tan an thawk lo a ni, a ti. Dan bawhchhetute chuan an bawhchhiat man an hmu bawk dawn a ni, a ti bawk. 

Buaina chhuah tirh lamah khan Trump hian US Capitol Building beitute dem zawnga thu post loin, a hmangaih thu leh an in lama haw tura a duh thu twitter-ah a post a, hemi hnu hian Facebook leh twitter chuan Trump-a account hi an tihtawp lailawk sak a ni. 

"American dang ang bawkin tharum thawhna, dan bawhchhiatna leh pawikhawihna thleng khan mi tithinur ve tho a ni. National Guard leh Federal law enforcement-te chu a rang thei ang bera building veng turin ka tir nghal a, America hi dan leh thupek kenkawhna ram a niin a ni reng bawk ang," a ti. 

Trump-a account hi twitter lam chuan an tihnun sak leh tawh a, a thusawi lai video pawh hi twitter-ah a post a ni. President elect Joe Biden hnena thlamuang tak leh buaina siam loa thuneihna hlan a tiam hnuah twitter hian a account hi an tinung leh a ni.