Germany-ah Covid-19 vaccine la tawh mi 4,17,000 an awm
Robert Koch Institute (RKI) chuan nikum December 27 aṭang khan mi 4,17,000-in Germany-ah Covid-19 vaccine an la tawh tih a tarlang.
Heng Covid-19 vaccine la tawh zingah hian health care worker mi 2,01,000 chuang an awm a, anni bakah hian nursing home-a mi 1,68,000 an awm bawk. German sorkar chuan vaccine la hmasa tura a tih zingah hian kum lama upate, a bikin kum 80 chin chunglam leh nurse-te an tel.
Germany health minister Jens Spahn chuan dam lohna leh hriselna lama harsatna neite bakah kum lama upa zawkte chu vaccine la hmasa tur hian ngaihpawimawh hmasak an nih thu a sawi a, hri leng mek hian khawvelah nasa takin harsatna a thlen mek a ni, a ti.
Nilaini khan European Commission chuan US company Moderna siam Covid-19 vaccine chu a pawm fel tawh a, pawm fel a nih hma hian European Medicines Agency chuan uluk takin a rin tlak dawn em tih a finfiah hmasa a ni.
Health minister Jens Spahn tarlan dan chuan Pfizer-BioNTech vaccine chu Germany-in a pawm tawh thu a sawi a, hei vang hian tun dinhmunah chuan an ram mi maktaduai 130 velin vaccine dose an lak theih a beisei thu a sawi.
German-ah hian Covid-19 hri kai mi 18,69,306 an awm tawh a, heng zinga mi 14,74,000 chu enkawl dam tawh niin, he hri vanga thi mi 39,258 an awm tawh bawk a ni.